13 мая 1917 г. Маці Божая аб’явілася ў партугальскім мястэчку Фаціма. У гэтым годзе спаўняецца 90 гадоў прызнання Касцёлам праўдзівасці гэтых аб’яўленняў і пасланняў. Дзякуючы заступніцтву Маці Божай Фацімскай адбылося шмат аздараўленняў – і фізічных і духоўных. Прапануем Навэнну праз заступніцтва Маці Божай Фацімскай за хворых, якім сёння так патрэбна наша малітоўная падтрымка. Навэнна распачынаецца 4 мая.
Навэнна да Маці Божай Фацімскай за хворага
Кожны дзень на працягу 9 дзён чытаюцца наступныя малітвы.
1. У імя Айца і Сына, і Духа Святога. Амэн.
2. Малітвы Анёла з Фацімы:
Праслаўленне Бога
О Божа, веру ў Цябе, праслаўляю Цябе, давяраю Табе і люблю Цябе. Прашу ў Цябе прабачэння для тых, хто не верыць у Цябе, не праслаўляе Цябе, не давярае Табе і не любіць Цябе. Амэн.
Да Найсвяцейшай Тройцы
О Найсвяцейшая Тройца, -- Айцец, Сын і Дух Святы! З глыбокаю пакораю хвалу Табе аддаю і ахвярую Табе Найсвяцейшае Цела і Кроў, Душу і Боскасць Пана нашага Езуса Хрыста, прысутнага на ўсіх алтарах усяго свету, як перапрашэнне за знявагі, святатацтва і абыякавасць, якімі Яго абражаюць.
Праз бясконцыя заслугі Яго Найсвяцейшага Сэрца і праз заступніцтва Беззаганнага Сэрца Марыі прашу ў цябе ласкі навяртання бедных грэшнікаў. Амэн.
Перапрашальная малітва
О мой Езу, прабач нам грахі нашыя, захавай нас ад агню пякельнага, прывядзі ўсе душы на неба і дапамажы асабліва тым, каму найбольш патрэбна Твая міласэрнасць.
3. Малітва да Маці Божай
Маці Божая Фацімская, Твой Сын выслухоўвае кожную Тваю просьбу. Заступіся, Апякунка наша, за хворага (назваць імя), за якога мы пакорна просім Цябе. Скажы толькі слова, і хворы выздаравее. Не адмаўляй нам гэтай ласкі, бо хворыя маюць асаблівае права на Тваю дабрыню. Таму, о Маці Божая, папрасі Езуса, каб Ён захаваў жыццё гэтай дарагой для нас асобы. Ты Сама, наша клапатлівая Маці, будзь для хворага добрай і міласэрнай Лекаркай, бо з Тваёй дапамогаю, мы перакананы ў гэтым, хвораму вернуцца страчаныя сілы. Аднак, калі Бог, чыя воля кіруе светам, вырашыў інакш, дапамажы, о Маці Наймілейшая, гэтаму хвораму і дай яму неабходныя сілы прыняць келіх горычы і ў супакоі аддаць сябе волі Бога Усемагутнага. Дай гэтаму хвораму цярплівасць, барані ад роспачы і адчаю. О Марыя, Маці Міласэрнасці, суцеш нас. Ты найлепшая Маці і прагнеш выратаваць нас. Пачуй жа нас ласкава і прыйдзі да нас з дапамогаю. Амэн.
Сэрца Марыі, аздараўленне хворых, маліся за нас.
Сэрца Марыі, суцяшэнне засмучаных, маліся за нас.
Маці Божая Фацімская, прытулак і надзея наша, маліся за нас.
Молімся: Беззаганнае Сэрца Марыі, Ты палаеш дасканалай любоўю да Сэрца Езуса, а для нас, грэшнікаў, ты заўсёды самае міласэрнае і чулае. Выпрасі нам у Сэрца Пана Езуса, Збавіцеля нашага, ласкі, аб якіх просім праз Тваё заступніцтва. О Маці Міласэрнасці, заступіся за нас, а Боскае Сэрца Езуса дзеля сыноўняй любові, якую будзе заўсёды мець да Цябе, несумненна, выслухае Цябе. Амэн.
Святыя Жасінта і Францішак, маліцеся за нас.
Ойча наш… Вітай, Марыя…Хвала Айцу…
Ілюстрацыя: ікона Маці Божай Фацімскай
(ikonazpostemdaniela.blogspot.com)
