Асаблівасцю сёлетняга фэсту ў Нацыянальным санктуарыі Маці Божай Будслаўскай стане святкаванне 25-годдзя каранацыі цудадзейнага абраза папскімі каронамі. Перад гэтым абразом вернікі ўжо больш за 400 гадоў выпрошваюць у Панны Марыі шматлікія ласкі і цуды, да яго прыходзяць зблізку і здалёку, каб памаліцца і ўшанаваць верную Апякунку Беларусі. Аднак няшмат хто ведае гісторыю гэтай нацыянальнай святыні. Доўгія стагоддзі наклалі свой адбітак амаль на кожнай дэталі маляванага абраза, яго багата аздобленай шаце і раме. І мала хто ўяўляе сапраўдны маштаб культу Маці Божай Будслаўскай, які ў апошнія дзесяцігоддзі актыўна развіваўся. З гэтай нагоды выдавецтва «Про Хрысто» падрыхтавала змястоўную кнігу «Апякунка Беларусі», прысвечаную цудадзейнаму абразу Маці Божай Будслаўскай. Пад адной вокладкай тут сабраныя тры важкія працы, кожная з якіх па-свойму раскрывае духоўнае багацце і ролю ў каталіцкім жыцці нашага Краю гэтага незвычайнага абраза.
Першы раздзел — «Абраз Маці Божай Будслаўскай» — гэта праца мастацтвазнаўцы Аляксандра Ярашэвіча, дзе сцісла распавядаецца пра гісторыю Будслава і ўзнікненне цудадзейнага абраза, пра цуды, звязаныя з ўшанаваннем Маці Божай Будслаўскай і занатаваныя ў кнізе аднаго з гвардыянаў даўняга будслаўскага кляштара. У раздзеле таксама падаецца цікавая інфармацыя пра старажытныя спісы і копіі цудадзейнага абраза Маці Божай.
У другім раздзеле — «Аздабленне абраза Маці Божай Будслаўскай у 1632–1783 гг.» — рэстаўратар Ігар Сурмачэўскі прапануе сваё даследаванне гісторыі цудадзейнага абраза, яго срэбранай шаты, каронаў Маці Божай і Дзіцяткі Езуса, а таксама багата аздобленай рамы. Аўтар меў магчымасць назіраць за рэстаўрацыяй абраза, якая была праведзена ў 2021–2022 гг. і дала магчымасць блізка судакрануцца з кожнаю дэталькаю на ім, што мае сваё загадкавае і цікавае паходжанне.
Трэці раздзел — «Вобраз Маці Божай Будслаўскай у сучасным мастацтве» — належыць аўтарству Алега Глекава, мастацкага і тэхнічнага рэдактара выдавецтва «Про Хрысто». Ён сабраў грунтоўную інфармацыю пра ўзнікненне, паходжанне і распаўсюджванне спісаў і копій цудадзейнага абраза з часоў адраджэння рэлігійнага жыцця і культу Маці Божай Будслаўскай на нашых землях. Акрамя таго, аўтар распавядае пра ўвасабленне вобраза Марыі з цудадзейнага абраза ў мастацкіх працах і ў дэкаратыўна-прыкладным мастацтве.
Хочацца спадзявацца, што кніга «Апякунка Беларусі» паспрыяе яшчэ большаму пашырэнню культу Маці Божай Будслаўскай, а таксама заахвоціць чытачоў заставацца вернымі ў сваёй малітве да Панны Марыі, не пакідаць надзеі і памятаць, што Багародзіца сама заўсёды прагне адорваць нас шматлікімі ласкамі, нават такімі, аб якіх мы не просім.
Ганна Шаўчэнка
