Па распараджэнні арцыбіскупа Юзафа Станеўскага, Мітрапаліта Мінска-Магілёўскага, з 5 жніўня 2023 года да 6 ліпеня 2024 года ў Нацыянальным санктуарыі ў Будславе і ў кожнай парафіі будзе праводзіцца малітоўная падрыхтоўка да прысвячэння Мінска-Магілёўскай архідыяцэзіі і ўсяго Каталіцкага Касцёла ў Беларусі Найсвяцейшаму Сэрцу Езуса, а таксама Год падзякі Маці Божай за Яе апеку і атрыманыя ласкі.
Асноўным днём, прызначаным для супольнай цэлебрацыі Эўхарыстыі і спецыяльных малітваў будзе кожная першая субота месяца (выключэнне: верасень, кастрычнік, студзень) на працягу ўсяго Года падзякі ў Нацыянальным санктуарыі, дзе, згодна з пададзеным ніжэй планам, з паасобных дэканатаў архідыяцэзіі запрашаюцца ўсе вернікі і супольнасці (асабліва першакамунійныя дзеці ў суботу 1 чэрвеня 2024 года) для ўшанавання Найсвяцейшай Панны Марыі Будслаўскай у Яе цудадзейным абразе, які на працягу стагоддзяў праславіўся асаблівымі ласкамі.
У межах правядзення Года падзякі ў Нацыянальным санктуарыі таксама будзе адбывацца падрыхтоўка да прысвячэння Каталіцкага Касцёла ў Беларусі Найсвяцейшаму Сэрцу Езуса: набажэнства перапрашэння Беззаганнага Сэрца Марыі; Фацімскі Ружанец пад дэвізам «Найсвяцейшае Сэрца Езуса, прыйдзі Валадарства Тваё праз Беззаганнае Сэрца Марыі!»; канферэнцыя на тэму адной Божай запаведзі і перапрашэнне Найсвяцейшага Сэрца Езуса за парушэнне гэтай Божай запаведзі. У Мінска-Магілёўскай архідыяцэзіі гэтая падрыхтоўка будзе адбывацца таксама на парафіяльным узроўні.
6 ліпеня 2024 года ў Нацыянальным санктуарыі Маці Божай Будслаўскай, на заканчэнне Года падзякі, падчас святкавання Будслаўскага фэсту, здзейснім інтранізацыю Найсвяцейшага Сэрца Езуса для ўсяго мясцовага Касцёла — прысвячэнне Мінска-Магілёўскай Мітраполіі і ўсіх вернікаў у Беларусі Найсвяцейшаму Сэрцу Езуса.
Далучаем матэрыялы, якія датычаць набажэнстваў у першы чацвер месяца, першую пятніцу і суботу:
- Тэксты для друку Распараджэння арцыбіскупа Станеўскага, плану і праграмы наведвання санктуарыя, а таксама праграмы парафіяльнага этапу падрыхтоўкі
- Адарацыя Найсвяцейшага Сакрамэнту ў першы чацвер месяца
- Набажэнства да Найсвяцейшага Сэрца Езуса ў першыя пятніцы месяца (абноўлена)
- Набажэнства перапрашэння Беззаганнага Сэрца Марыі ў першую суботу месяца
- Перапрашэнне за незахаванне і парушэнне Божых запаведзяў (новае)
- Дапаможныя матэрыялы пры разважанні над запаведзямі Дэкалога (абноўлена)
Рыхтуюцца кнігі з тэкстамі набажэнстваў, якія павінны выйсці з друку на пачатку верасня.
