Пад такою назвай 19 красавіка ў Віцебскай абласной бібліятэцы адбылася вечарына, прысвечаная святу Змёртвыхпаўстання Езуса Хрыста.
Дагэтуль супрацоўніцтва дыяцэзіяльнай каталіцкай супольнасці Віцебшчыны з галоўнаю бібліятэчнаю ўстановай рэгіёна абмяжоўвалася каляднымі імпрэзамі, таму цяперашнюю ў плане развіцця культурніцкіх кантактаў можна лічыць знакавай, што яскрава засведчылі і прысутнасць на ёй ардынарыя дыяцэзіі біскупа Алега Буткевіча, і адміністрацыі бібліятэкі на чале з яе дырэктарам Таццянай Адамян, і ўзровень падрыхтоўкі святочнай праграмы, аснову якой, як і заўсёды падчас такіх імпрэзаў, склалі рэлігійныя спевы, празаічныя ды паэтычныя творы духоўнага кірунку, інтэрпрэтацыі ўзораў фальклорнай спеўна-музычнай культуры.
З улікам таго, што вечарына адбывалася ў перыяд паміж святкаваннем Вялікадня прадстаўнікамі каталіцкай і праваслаўнай канфесій, бралі ў ёй удзел і адны, і другія. Вынікам супрацы стала відовішчнае дзейства, якое і падставу для роздуму аб горнім стварала, і добраму настрою з нагоды вялікай падзеі Уваскрасення Збаўцы, нягледзячы на трагічныя падзеі апошняга часу, спрыяла, і надзею на лепшае мацавала. У немалой ступені – дзякуючы дэталёва прадуманай, зладжанай працы вядоўцаў мерапрыемства: загадчыцы аддзела краязнаўства бібліятэкі Ларысы Рагачовай і верніка парафіі Езуса Міласэрнага, культработніка Васіля Мядзюхі.
Адкрываў вечарыну хор парафіі катэдральнага касцёла Езуса Міласэрнага пад кіраўніцтвам сястры Ёнашы. Як заўсёды, удзельнікі яго рабілі сваю справу натхнёна, з любоўю да таго, з чым выйшлі да публікі, чым міжволі запалілі яе жаданне не проста слухаць, але і суперажываць, падтрымаць і спевам, і дружнымі воплескамі. Гэты ж калектыў, дарэчы, і закрываў свята імправізаваным спевам-развітаннем, быццам адмыслова ставячы запамінальнае шматкроп’е з надзеяй на працяг падобных сустрэчаў у будучыні.
Апроч хору, парафіяне галоўнай святыні дыяцэзіі разам са сваім пробашчам Валерыем Марціноўскім паказалі і іншыя нумары: у цудоўным выкананні вернікаў Алега Рудзько, Марыі Ткачэнкі і сястры Серафіны прагучалі вершы Рыгора Барадуліна, Мар’яна Дуксы, Ірыны Багдановіч з нізак у часопісе «Наша вера». У чарговы раз парадаваў прысутных выдатным дэкламаваннем прозы (паданнем пра велікоднае яйка) заўсёдны ўдзельнік такіх імпрэзаў Мікола Клімаў.
Добрым сюрпрызам стала для аўдыторыі выступленне іншагародніх гасцей — народнага самадзейнага калектыву «Крыніца» філіяла «Бачэйкаўскі СДК» і народнага ансамбля народнай песні «Весялуха» ўстановы «Бешанковіцкі раённы цэнтр культуры». Іх дасціпная, вытрыманая ў стылі народнага гуляння праграма літаральна паланіла ўсіх. Густоўныя спевы з характэрнымі словамі гаворак жыхароў паўночнага Прыдзвіння, жартоўныя гульні, перапевы – усё гэта дэманстравала і талент продкаў, што стварылі гэткі мастацкі цуд, і шчырае жаданне выканаўцаў данесці неацэнны народны скарб да сучаснага слухача, пашырыць кола тых, каму гэты скарб, запаўшы аднойчы ў душу, назаўсёды стане дарагім і родным.
Без перабольшання, выклікаў узрушэнне ў зале заклік да ўдзелу ў імправізаваным качанні яек. Быццам да часоў дзяцінства вярнуліся людзі старэйшага веку, быццам сведкамі падарожжа ў часе да пары маладосці дзядоў і бацькоў сталі маладзейшыя. Прызы ў выглядзе здабытых яек найбольш пашчасціла атрымаць дырэктару бібліятэкі Таццяне Адамян: так, мабыць, за гасціннасць бібліятэкараў сам лёс гаспадарам у гэты светлы веснавы дзень аддзячыў…
Фінальным акордам імпрэзы стала выступленне біскупа Алега Буткевіча, які пасля слова пра Змёртвыхпаўстанне ўкрыжаванага за кожнага з нас Езуса праспяваў пад уласны акампанемент вядомую амаль кожнаму католіку песню «Любоўю жыць».
Францішак Дубраўскі.
Фота Вольгі Дарафеевай.
